Það er orðin árleg hefð hér á landi að rífast um flugelda, hvort sem það er af umhverfissjónarmiðum eða til að vernda gæludýrin þá skiptist almenningur í tvennt um hver áramót og í ár var engin undantekning á því. Ritstjórn Morgunblaðsins gerir þetta að umræðuefni sínu í ritstjórnardálkinum Staksteinar í Morgunblaðinu í dag.
Einstaklingurinn sem ritar Staksteina virðist ekki vera virkilega hrifinn af útspili Umhverfisstofnunar fyrir áramótin ef marka má pistilinn sem birtist í blaðinu í dag. Sá sem heldur á penna furðar sig á því að stofnunin sé með herferð á samfélagsmiðlum þar sem fólk er hvatt til þess að öskra árið burt í staðinn fyrir að sprengja flugelda.
„Nú er ekki vitað til að það sé stefna stjórnvalda að stöðva flugeldasölu um áramót enda eru þeir leyfileg söluvara hér á landi og eiga sinn tíma. Þekkt er að þeir eru helsta fjáröflunarleið björgunarsveita landsins. Flugeldasalan er hreinlega forsenda þess að þær geti starfað eins og þær hafa gert.“
Í Staksteinunum segir að Umhverfisstofnun telji að björgunarsveitirnar geti fjármagnað sig með öðrum hætti en sá sem ritar pistilinn segir að það sé „athyglisvert innlegg“ frá stofnuninni.
„Svo hefur Umhverfisstofnun líka sett fram tillögu um hvernig Íslendingar geti komið sér upp nýjum áramótahefðum, sem er auðvitað líka hlutverk Umhverfisstofnunar. Þar er til dæmis velt upp þeirri hugmynd að „fjölskyldan myndi safnast saman á miðnætti og „öskra burt árið“.“
Að lokum kemur höfundur Staksteina með tillögur um að ganga enn lengra þegar kemur að því að skipta hlutum út fyrir öskur en það virðist vera gert í kaldhæðni eins og margt annað í pistlinum.
„Auðvitað hlytu allir að hlakka til áramótanna og fá að öskra burt árið. En hvers vegna að láta staðar numið þar? Margt annað en flugeldar getur verið skaðlegt í miklu magni. Hvað með að enda máltíðina á gamlárskvöld með sameiginlegu öskri í stað þess að bera fram ísinn? Eða á aðfangadagskvöld, er ekki miklu hátíðlegra að öskra inn jólin en að innbyrða dísætan eftirréttinn?“
