Guðlaugur Þór Þórðarson, umhverfis-, orku- og loftslagsráðherra, segir að uppbygging virkjana sé að hefjast og segir að síðasta vor hafi tekist að rjúfa níu ára kyrrstöðu í orkumálum með því að ljúka 3. áfanga rammaáætlunar og með því að einfalda ferlið við stækkun virkjana.

Morgunblaðið skýrir frá þessu. Segir blaðið að Guðlaugur boði uppbyggingu vatnsaflsvirkjana og að framkvæmdir við Hvammsvirkjun, í neðri hluta ÞJórsár, hefjist á næsta ári.

Einnig hafi ÍSOR verið falið að kortleggja jarðhitasvæði og Orkuveita Reykjavíkur sé í startholunum hvað varðar uppbyggingu.

Hvað varðar áhuga erlendra aðila á orku Íslendinga sagði Guðlaugur að Íslendingum veiti ekki af allri sinni orku í fyrirsjáanlegri framtíð vegna orkuskiptanna. Hugmyndir flestra þessara aðila um sæstreng séu óraunhæfar og segist hann hafa lagt áherslu á að fólk hætti að velta þeim fyrir sér.

Hægt er að lesa nánar um málið í Morgunblaðinu í dag.