Hinn 92 ára milljarðamæringur og mannvinur Warren Buffet hefur á hverju ári síðan 2006 gefið háar upphæðir til mannúðarmála. Fimm samtök hafa notið góðs af gjafmildi hans. Í síðustu viku kom hann mjög á óvart þegar hann gaf hlutabréf að verðmæti 750 milljóna dollara til mannúðarmála.  Þetta er í fyrsta sinn sem hann gefur svo háa fjárhæð tvisvar á sama árinu.

CNBC skýrir frá þessu og segir að Buffett hafi tilkynnt um gjöfina á þakkargjörðardaginn á fimmtudaginn.

Gjöfin fer meðal annars til Susam Thompson Buffett Foundation sem er sjóður nefndur eftir fyrstu eiginkonu Buffett. Að auki renna peningar í kassa þriggja sjóða sem börn Buffett stýra.

Auður Buffett er metinn á sem svarar til um 14.000 milljarða íslenskra króna.

Hann strengdi þess heit 2006 að fram að andláti sínu muni hann gefa 99% af auðæfum sínum til mannúðarmála.

Hann hefur allar götur síðan gefið háar fjárhæðir einu sinni á ári til Susan Thompson Buffett Foundation auk sjóðanna þriggja sem börn hans stýra. Að auki hefur hann gefið háar fjárhæðir til Bill and Melinda Gates Foundation.