Þeir veiða aleinir, dragast að málmum og éta jafnvel félaga sína. Þetta eru kolkrabbar en lengi hefur verið vitað að þeir eru mjög greindir. Nú hefur ný rannsókn leitt í ljós að þeir hegða sér ekki alltaf vel. Þeir virðast eiga það til að grýta botnleðju, þörungum og jafnvel skeljum í aðra kolkrabba.

The Guardian segir að vísindamenn, sem voru að rannsaka Octopus tetricus, hafi myndað dýrin þegar þau gripu um brak með örmum sínum og sprautuðu síðan vatni úr sogskálum sínum á hlutina til að þeyta þeim frá sér.

Vísindamennirnir segja að kolkrabbarnir virðist nota þessa aðferð þegar þeir eru að þrífa í kringum sig eða losa sig við skeljar eftir að hafa étið innan úr þeim. En þeir sáust einnig nota þessa aðferð til að kasta í aðra kolkrabba og var ekki annað að sjá en að þetta væri gert vísvitandi.

Peter Godfrey-Smith, prófessor og aðalhöfundur rannsóknarinnar, sagði að þessi hegðun hefði komið mjög á óvart. Sjaldgæft sé að dýr kasti hlutum sem þau hafa sankað að sér. Það sé mjög óvenjulegt að þetta sé gert í vatni og það sé mjög erfitt.