Andlát Elísabetar II í gær hefur mikil áhrif á þegna hennar en einnig á fólk um allan heim. Hún var 96 ára þegar hún lést og hafði verið þjóðhöfðingi í 70 ár, lengur en nokkur annar breskur þjóðhöfðingi.

Í umfjöllun Washington Post er bent á þá fróðlegu staðreynd að 9 af hverjum 10 núlifandi jarðarbúum fæddust á valdatíma Elísabetar og þekkja því ekkert annað en að hún sé þjóðhöfðingi Bretlands og nokkurra samveldisríkja.

Blaðið byggir útreikninga sína á gögnum frá bandarísku leyniþjónustunni CIA sem heldur úti stórum gagnabanka á netinu með ýmsum upplýsingum um ríki heimsins.