Hann lét þessi ummæli falla í samtali við Sky News og sagði einnig að smitum af völdum veirunnar fari nú fjölgandi vegna þess að veiran þróist sífellt og sé að verða „of snjöll“.
Samkvæmt nýjum gögnum, sem voru birt á miðvikudaginn, eru það BA.4 og BA.5 afbrigði Ómíkron sem eru útbreiddust í Bretlandi þessa dagana en þar hefur smitum fjölgað mikið að undanförnu. Lord Kamall, heilbrigðisráðherra, hefur varað við því að hugsanlega þurfi að grípa til sóttvarnaaðgerða á nýjan leik ef faraldurinn fer að ganga nærri heilbrigðiskerfinu.
Í samtali við Sky News sagði Nabarro að kórónuveiran sé fær um að þróast og breytast í sífellu: „Ástæðan fyrir aukningu smita er að hún hefur breyst enn einu sinni og er orðin of snjöll fyrir okkur. Hún getur komist fram hjá ónæmisvörnum okkar og þess vegna fjölgar smitum.“
Hann sagði að það eigi einnig sinn þátt í þessu að fólk umgangist nú fleiri en áður og fari ekki nógu varlega, til dæmis með því að nota andlitsgrímur.
„Mitt ráð til allra er að veiran er ekki horfin af sjónarsviðinu, hún verður ekki svo mörgum að bana en hún er mjög óþægileg, sérstaklega ef þú færð langvarandi COVID-19. Jafnvel þótt okkur líki það ekki þá verðum við að halda áfram að bera virðingu fyrir þessari veiru,“ sagði hann.
Hann lofsamaði einnig árangurinn af bóluefnunum gegn veirunni og hvatti fólk til að tryggja að það sé bólusett samkvæmt ráðleggingum yfirvalda.
