Einar Kárason rithöfundur hefur lýst því yfir að hann vilji ekki koma nálægt mótmælafundum gegn söluferlinu á hlut ríkisins í Íslandsbanka sem haldnir eru hvern laugardag á Austurvelli. Ástæða óbeitar Einars á fundahaldinu er sú að fundirnir eru á vegum Sósíalistaflokks Íslands, meðal annarra. Í FB-hópi flokksins segist Einar hvað eftir annað hafa lesið skrif þar sem innrás Rússa inn í Úkraínu er varin.

Á laugardag sagði Einar á Facebook-síðu sinni:

„Forystumenn og stofnendur „Sósíalistaflokksins“ hafa útskýrt og réttlætt morðárásir Rússa á Úkraínufólk. Á þeim er að skiljast að sanngjarnt sé að börn, sjúklingar og gamalmenni séu drepin, vegna útþenslustefnu Vesturlanda. Á meðan lið sem þannig talar er með í að efna til mótmæla á Austurvelli, þá held ég mig fjarri þeim.“

Ólína Þorvarðardóttir var á meðal ræðumanna á mótmælafundinum síðasta laugardag og birti hún myndir frá fundinum á Facebook-síðu sinni. Í ummælakerfinu fyrir neðan færsluna skrifar Einar:

„Sósíalistaflokkurinn skilur mjög vel morðárásir á fólk í Úkraínu. Maður er ekki með þeim á fundi.“

Ólína bendir Einari á að margir hafi staðið að fundinum, meðal annars ungliðahreyfingar stjórnmálaflokkanna. Að blanda Úkraínustríðinu inn í þetta mál sé ómálaefnalegt og óskiljanlegt.

Gunnar Smári Egilsson, einn helsti stofnandi Sósíalistaflokksins, skrifaði:

„Og þó allir ræðumenn hafi verið í Sósíalistaflokknum, hvað væri að því? Eiga Sósíalistar að nú að þegja? Af því Einar Kárason er pólitískt ólæs? Og það eru miklu fleiri en einn sósíalisti sem stóð að undirbúningnum, í raun væri rétt að segja að þeir hafi borið hitann og þungan af undirbúningnum, þótt þeir séu ekki að flagga því eða troða sér að hljóðnemunum.“

Einar var ekkert að skafa utan af því í svari sínu við þessu innleggi Gunnars Smára:

„En ekki má samt gleyma því að þú ert bæði huglaus og heimskur.“

Gunnar Smári bregst við þessum ummælum með því að bjóða hinn vangann:

„ævinlega kærar þakkir elskulegur“

Og Einar svaraði að bragði:

„Hvenær sem er kæri vin.“