Það kemur oft fyrir að fólk finni falinn fjársjóð í geymslurýmum. Það kemur þó ekki á hverjum degi fyrir að umræddur fjársjóður sé 400 ára gamalt málverk sem gæti verið hundrað milljóna virði.

Einmitt það gerðist þó í Ástralíu en þar fannst á dögunum 400 ára gamalt málverk sem talið er að hafi verið málað af syni hollenska meistarans Willem Claesz. Heda, sem er af mörgum talinn vera einn af mögnuðustu málarameisturum Hollands. Gerrit Willemsz. Heda. heitir sonur meistarans en talið er að faðirinn þekkti hafi hjálpað syni sínum við gerð verksins.

Málverkið fannst á meðal 60.000 listaverka sem voru hluti af gjöf til National Trust of Australia. „Þetta er sjaldgæft og gríðarlega spennandi augnablik,“ sagði Julian Bickersteth, framkvæmdastjóri International Conservation Services, fyrirtækisins sem sér um að laga málverkið, í yfirlýsingu sem gefin var út eftir að málverkið fannst.

Í yfirlýsingunni kemur fram að undirskrift sonarins er mjög lík undirskriftinni sem faðir hans setti á málverkin sín. Það er eitt af því sem ýtir undir hugmyndir um að um sé að ræða listaverk eftir þá báða.

Ekki er víst hversu mikils virði nákvæmlega málverkið er en verk eftir Heda hafa verið metin á um 380 til 480 milljónir íslenskra króna.