Hans Liljendal Karlsson hefur verið ráðinn nýr sviðsstjóri tæknisviðs hjá Isavia ANS. Hann hefur störf í apríl. Hans er með B.Sc. gráðu í hugbúnaðarverkfræði frá IHK í Kaupmannahöfn og er í MBA námi í Háskólanum í Reykjavík.
Hans hefur starfað hjá Veitum frá árinu 2013 og sem forstöðumaður Kerfisþróunar og stýringar síðustu ár. Þar hefur hann borið ábyrgð á rekstri sviðsins, fjárhags- og fjárfestingaráætlunum og stefnumótun og framtíðarsýn.
„Við bjóðum Hans Liljendal innilega velkominn til okkar og hlökkum við til samstarfsins“ segir Kjartan Briem, framkvæmdastjóri Isavia ANS. „Við fögnum því að fá til okkar sterkan liðsfélaga í þau fjölbreyttu verkefni sem eru framundan hjá okkur“.
Isavia ANS ehf. er dótturfélag Isavia ohf. Isavia ANS annst rekstur og uppbyggingu flugleiðsöguþjónustu, þ.m.t. flugumferðarþjónustu, fjarskipta- og leiðsögukerfa og aðra skylda starfsemi. Félagið veitir íslenskum og erlendum loftförum flugleiðsöguþjónustu í íslenska flugstjórnarsvæðinu og á íslenskum flugvöllum.
Hjá Isavia ANS starfa um 270 manns og eru höfuðstöðvar félagsins við Reykjavíkurflugvöll.
