Leiðtogar aðildarríkja ESB komu saman til fundar í Brussel í gær til að ræða innrás Rússa í Úkraínu og hvaða refsiaðgerða eigi að grípa til gegn Rússum. Charles Michel, forseti ESB, sagði að fundi loknum að refsiaðgerðirnar verðir „sársaukafullar fyrir rússnesku stjórnina“.

Ursula von der Leyen, formaður Framkvæmdastjórnar ESB, sagði að refsiaðgerðirnar samanstandi af fimm þáttum.

Sá fyrsti er fjármálageirinn en 70% af rússneska bankamarkaðnum verða fyrir áhrifum af refsiaðgerðunum. Von der Leyen sagði að aðgerðirnar muni gera að verkum að lokað verður á aðgang Rússa að mikilvægustu fjármálamörkuðum heims. Það mun auka kostnað þeirra við lántöku og valda aukinni verðbólgu í Rússlandi.

Annar þátturinn eru aðgerðir sem beinast gegn rússneska orkugeiranum. ESB mun banna útflutning á mikilvægum búnaði fyrir olíuhreinsistöðvar til Rússlands. Það mun gera að verkum að Rússar geta ekki uppfært olíuvinnslustöðvar sínar. Von der Leyen sagði að Evrópa væri of háð Rússum varðandi orku og nú verði að gera allt sem hægt er til að draga úr vægi olíu, gass og kola frá Rússlandi.

Þriðji þátturinn er flutningageirinn en ESB mun banna sölu á öllum varahlutum í flugvélar. Þetta mun hafa mikil áhrif á rússneska fluggeirann og veikja samgöngur í landinu. Þrír fjórðu hlutar af þeim flugvélum sem eru notaðar í Rússlandi eru smíðaðar í Evrópu, Bandaríkjunum og Kanada.

Fjórði þátturinn er að aðgangur Rússa að mikilvægri tækni verður takmarkaður. Von der Leyen sagði að þetta muni koma í veg fyrir að Rússar geti nútímavæðst.

Fimmti þátturinn er að reglur um vegabréfsáritanir verða hertar. Rússneskir diplómatar og kaupsýslumenn munu ekki lengur hafa eins góðan aðgang að ESB eins og áður.