Öldum saman hafa herlið staðið frammi fyrir erfiðum aðstæðum í Úkraínu þegar átök hafa staðið yfir. Ástæðan er að á hverju vori breytast slétturnar í illfært leðjusvað. Rússar hafa oft notið góðs af þessu þegar ráðist hefur verið á landið en nú gæti þetta valdið her þeirra vanda.
Í Rússlandi og Úkraínu er orðið „rasputitsa“ notað yfir þetta fyrirbæri en orðið þýðir „vegalausi tíminn“ en hann skellur á á hverju vori og hausti þegar snjór og ís bráðna og þegar miklar haustrigningar breyta vegum og landslaginu í risastórt leðjusvað.
Þetta leðjusvað verndaði Rússa gegn innrás Napóleons 1812 og Þjóðverja 1941. En nú gæti leðjan gert rússneska hernum erfitt fyrir ef Vladímír Pútín, Rússlandsforseti, ákveður að senda rússneska herinn inn í Úkraínu.
Kirill Mikhailov, hernaðarsérfræðingur hjá CiT samtökunum sem fylgjast með rússneska hernum, sagði í samtali við Washington Post að það sé mjög óheppilegt að gera innrás að vori til. Landslagið gjörbreytist. Ef gera eigi innrás verði að gera hana í janúar eða febrúar.
CNN segir að gögn frá Copernicus veðurgervihnetti ESB sýni að janúar hafi verið hlýrri og blautari í stórum hluta Austur-Evrópu en venja er. Í Úkraínu var hitinn 1 til 3 gráðum yfir meðallagi. Þetta og meiri úrkoma þýðir minna frost og meiri leðja. Veðurspáin næstu daga gerir einmitt ráð fyrir hita en ekki frosti í austanverðri og norðanverðri Úkraínu.
