Óhætt er að segja að rekstrarafkoma danska flutningafyrirtækisins A.P. Møller-Mærsk hafi verið góð á síðasta ári. Hagnaður fyrirtækisins var 117 milljarðar danskra króna eftir skatt. Þetta svarar til rúmlega 2.200 milljarða íslenskra króna.

Þetta er methagnaður hjá fyrirtækinu og raunar hefur danskt fyrirtæki aldrei skilað svona miklum hagnaði.

Velta fyrirtækisins var 400 milljarðar danskra króna. Danska ríkisútvarpið skýrir frá þessu.

Helsta ástæðan fyrir þessari ótrúlegu rekstrarniðurstöðu er að verð á gámaflutningum hefur hækkað mikið eftir að heimsfaraldur kórónuveirunnar skall á. Að auki lauk fyrirtækið við fjölda breytinga í rekstri sínum á síðasta ári.