Þetta kemur fram í Morgunblaðinu í dag. Haft er eftir Lilju að bankarnir séu að skila ofurhagnaði og hann aukist í kjölfar hækkunar stýrivaxta. „Ég tel að það eigi að nota þennan ofurhagnað til að greiða niður vexti fólksins í landinu,“ er haft eftir henni.
Aðspurð sagði hún ekki óeðlilegt að fjármálastofnanir skili hagnaði en þetta sé gríðarlega mikill hagnaður, til dæmis hafi Landsbankinn hagnast um 30 milljarða í fyrra. „Þetta er hins vegar ofurhagnaður og til þess að við öll, samfélagið, komum vel út úr faraldrinum þurfum við að jafna byrðarnar,“ sagði hún.
Lilja sagðist telja að það sé samfélagslega ábyrgt af bankakerfinu og fjármálastofnunum að styðja við samfélagið á leið út úr faraldrinum. „Það skeið er að hefjast með því að Seðlabankinn er að hækka stýrivexti til að slá á hækkun vísitölu neysluverðs og við vitum auðvitað hvað drífur hana áfram – það er húsnæðisliðurinn – og við eigum líklega eftir að sjá meiri vaxtahækkanir. Ég tel því mjög mikilvægt að ákveðin heimili, sérstaklega ungs fólks og tekjulágra, sitji ekki eftir með svarta pétur. Það er því betra að bankarnir komi strax inn í þetta og fari að huga að heimilunum í landinu og ef bankarnir finna ekki einhverja lausn á því tel ég að við ættum að endurvekja bankaskattinn,“ sagði hún.
