Það þarf oft að hafa hraðar hendur þegar opnað er fyrir miðasölu á tónleika vinsælla hljómsveita til að fá miða. Ef það tekst ekki að kaupa þá strax þarf oft að kaupa þá mun dýrari af fólki sem hefur keypt fjölda miða til að selja aftur og ekki er útilokað að maður lendi þá í klóm óprúttinna aðila sem selja falsaða miða. Duncan Robb frá Chesterfield á Englandi brást því hratt við þegar hann sá að hljómsveitin Red Hot Chili Peppers ætlaði að halda tónleika í Belfast á Norður-Írlandi fyrir um fjórum árum.

Hann keypti strax miða handa sér og unnustu sinni sem er einlægur aðdáandi hljómsveitarinnar heimsfrægu. Því næst keypti hann flugmiða og þar með var hann búinn að tryggja að hann gæti komið unnustunni á óvart og glatt hana mjög.

Viku áður en tónleikarnir áttu að fara fram fóru þau að skoða málið betur, svona til að vita hvað upphitunarhljómsveit stigi á stokk en það var ekki auðvelt að finna út úr því.

„Unnusta mín ætlaði að finna út úr hver myndi hita upp fyrir hljómsveitina en fann engar upplýsingar um að hljómsveitin væri að fara að spila í Belfast,“ sagði Duncan Robb í samtali við ABC.

Það var svo sem ekki undarlegt að hún gæti ekki fundið neinar upplýsingar um tónleika Red Hot Chili Peppers í Belfast því hljómsveitin var bara alls ekki á leið þangað til að halda tónleika.

Robb hafði í flýtinum við að kaupa miða á tónleikana mislesið nafn hljómsveitarinnar því það var Red Hot Chili Pipers sem var að fara að spila í Belfast. Þetta er sekkjapípuhljómsveit og að eigin sögn sú besta í heimi.

Mikið hefur verið hlegið að þessum hrakförum Robb en hann og unnustan létu sig nú hafa það og fóru á tónleikana með Red Hot Chili Pipers.

Þetta var ekki í fyrsta sinn sem mál af þessu tagi kom upp í tengslum við tónleika Red Hot Chili Pipers og því gætir hljómsveitin þess alltaf að skotapils og sekkjapípur sjáist vel á auglýsingum hennar. „Við myndum aldrei þykjast vera Red Hot Chili Peppers, við virðum þá svo mikið,“ sagði Douglas Gillespie, umboðsmaður sekkjapípuleikaranna, í samtali við Newsweek.