Nafn tegundarinnar, bodoensis, er tilkomið vegna höfuðkúpu sem fannst í Bodo D‘ar í Eþíópíu. Independent skýrir frá þessu.
Ísöld ríkti þegar þessi tegund var uppi en vísindamenn segja að þetta tímabil sé mjög mikilvægt í sögu mannkyns því á því kom nútímamaðurinn, Homo sapiens, fram á sjónarsviðið en hann er nánasti ættingi okkar núlifandi manna en við erum af tegundinni Homo sapiens sapiens. Einnig kom Neanderdalsmaðurinn fram á sjónarsviðið í Evrópu á þessum tíma.
Fornleifafræðingar hafa þó sagt þetta tímabil vera „grautinn í miðjunni“ því svo margt er óljóst um þróun manna á þessum tíma miðað við þá steingervinga sem fundist hafa. Nýja tegundin kemur í staðinn fyrir tvær tegundir, Homo rhodesiensis og Homo heildelbergensis, sem hverfa af sjónarsviðinu með tillögu vísindamannanna um að Homo bodoensis verði tekin í tölu manntegunda.
Í nýrri rannsókn var hulunni svipt af Homo bodoensis. Aðalhöfundur rannsóknarinnar, Mirjana Roksandic hjá University of Winnipeg í Kanada, segir að erfitt hafi verið að ræða um þróun manna á þessum tíma vegna skorts á nákvæmum hugtökum sem gera ráð fyrir landfræðilegum fjölbreytileika manna.
Samkvæmt nýju skilgreiningunni þá nær Homo bodoensis yfir flesta menn frá Afríku og suma frá suðaustanverðri Evrópu á þessum tíma en margir frá Evrópu falla undir flokk Neanderdalsmanna.
Christopher Bae, meðhöfundur rannsóknarinnar, sagði að með því að kynna Homo bodoensis til sögunnar sé stefnt að því að leysa ákveðinn vanda og auðvelda skýr samskipti um þennan mikilvæga tíma í þróun manna.
Rannsóknin hefur verið birt í vísindaritinu Evolutionary Anthropology Issues News and Reviews.
