Það er óhætt að segja að Jack Dorsey, forstjóri Twitter, sé ekki bjartsýnn hvað varðar nánustu framtíð. Eins og fram hefur komið í fréttum að undanförnu þá mun vöruskortur væntanlega gera vart við sig fyrir jólin vegna vandræða með flutning á vörum á milli heimsálfa. En miðað við það sem Dorsey segir þá líkur vandræðunum ekki þar.

„Óðaverðbólga mun breyta öllu. Það mun gerast,“ tísti hann 23. október. Insider skýrir frá þessu. Með þessu er hann að benda á verðhækkanir sem nú koma fram á vörum og þjónustu í Bandaríkjunum og víðast hvar um heiminn.

Þegar heimsfaraldur kórónuveirunnar skall á héldu Bandaríkjamenn fast um budduna og drógu úr neyslu sinni og það sama gerði fólk í mörgum öðrum löndum. En síðan fór að rætast úr og fólk fór aftur að eyða peningum og verslanir þurftu að panta vörur til að mæta aukinni eftirspurn. Þetta hefur valdið miklu álagi á vöruflutningakerfi heimsins og nú er svo komið að það ræður ekki við álagið. Það eru margir samverkandi þættir sem valda þessu, meðal annars skortur á flutningabílstjórum og starfsfólki til að meðhöndla vörurnar á ýmsum stigum flutninga.

Af þessum sökum bíða verslunareigendur og innflytjendur víða um heim óþreyjufullir eftir að vörurnar þeirra komi í hús en þær eru fastar í gámum víðs vegar um heiminn.

Dorsey segir að þetta geti valdið óðaverðbólgu sem muni valda því að verð á vörum og þjónustu muni hækka stjórnlaust um hríð. Óðaverðbólga er oft afleiðing af krísum á borð við stríð eða eins og nú heimsfaraldurs og meðfylgjandi vandræða við vöruflutninga.