„Staðan er nokkuð góð, við sjáum hvort ég nái í liðið. Það er allt í góðu,“ sagði Jóhann Berg Guðmundsson leikmaður landsliðsins á fréttamannafundi í Laugardalnum í dag. Jóhann var ekki klár í slaginn gegn Norður-Makedóníu á sunnudag en gæti spilað gegn Þýskalandi á morgun.

Jóhann var fyrirliði Íslands gegn Rúmeníu á fimmtudag í síðustu viku og var stoltur af því. „Það var gríðarlega gaman, forrétindi að vera í þeirri stöðu. Öllum ungum krökkum dreymir um að leiða liðið út í svona leik, maður hefði viljað betri úrslit en það kemur,“ sagði Jóhann en Ísland tapaði leiknum.

Jóhann horfði á íslenska liðið eiga slæman leik gegn Norður Makedóníu á sunnudag en liðið átti fínan endapsrett og bjargaði stigi.

„Maður sá það síðustu tuttugu mínúturnar hvernig við eigum að spila, fyrri hálfleikur var ekki nógu góður. Mörk breyta leikjum því við fengum færi snemma leik, mér fannst vanta hraða með og án bolta. Pressan var ekki alveg að ganga, við höfum farið vel yfir það. Þjálfararnir hafa verið með flotta fundi og sagt frá því hvað þeir ætlast til af íslenska liðinu. Mér finnst við þurfa að gera betur.“

Mikið hefur rætt og ritað um landsliðið eftir að stjórn sambandsins og formaðurinn sagði starfi sínu lausu.

„Umtalið í kringum liðið hefur verið eins og það er. Það er erfitt fyrir suma og aðrir taka þessu betur. Ungu strákarnir eru frábærir í fótbolta. Þeir eiga eftir að læra heilmilið að vera í kringum eldri leikmennina. Þeir finna hvað það þarf til að ná í úrslit í íslenska landsliðinu Við erum ekki Þýskaland eða Portúgal, það eru ákveðnir hlutir sem við þurfum að gera til að ná í úrslit.“

„Þetta hefur verið hálf skrýtið, við getum bara farið inn á völlinn og gert okkar besta. Við gerum það allir.“