„Fólk gerir mistök. Það er kallað að vera mannlegur,“ svona hefst pistill sem Magnús Björn Ásgrímsson, formaður knattspyrnudeildar Leiknis Fáskrúðsfirði þar sem hann biðst afsökunar á því að hafa krafist þess að stjórn KSÍ segði af sér.
Stjórnin sagði starfi sínu lausu fyrir rúmri viku, sambandið hefur verið sakað um að hylma yfir og þagga niður meint brot landsliðsmanna í knattspyrnu. Féll stjórnin og sagði formaðurinn, Guðni Bergsson af sér vegna málsins.
Leiknir Fáskrúðsfirði var eitt þeirra félaga sem krafðist þess að stjórnin segði af sér en Magnús sér eftir því í dag. „Ég setti nafnið mitt (og Leiknis) undir bréf frá ,,neðrideilda félögum” til stjórnar KSÍ, sem í raun fól í sér kröfu um brotthvarf stjórnarinnar í heild, með hraði. Það var heimska. Og algjörlega ómaklegt. Þetta fólk hefur starfað af heilindum og ósérhlífni fyrir knattspyrnuhreyfinguna, flest í áratugi. “
„Stjórn KSÍ er skipuð fulltrúum aðildarfélaganna, kosnum á ársþingum og þar standa þeir skil á störfum sínum og stöðu mála hjá sambandinu. Og vel að merkja stjórnarstörfin eru ólaunuð. Auðvitað áttu allir að anda djúpt og vinna þessi mál betur og mæta síðan til hefðbundins knattspyrnuþings í febrúar.“
Magnús birtir svo póst sem hann sendi stjórn KSÍ sem lætur af störfum í október.
Kæru stjórnarmenn,
Langar að biðja ykkur afsökunar á að hafa sett mitt nafn (og UMF Leiknis) undir bréf ,,neðrideildarfélaga” með kröfu um aukaþing sambandsins.
Þar hjó sá er hlífa skyldi. Ég held að ég hafi ekki séð jafn mikið eftir neinni ákvörðun á þeim tæpa aldarfjórðungi sem ég hef starfað fyrir UMF Leikni.
Jafnframt þakka ég fyrir ykkar ómetanlega framlag til íslenskrar knattspyrnu og vona að einhver ykkar og helst sem flest, gefið kost á ykkur til áframhaldandi stjónarsetu eftir aukaþingið.
Með knattspyrnukveðju,
Magnús Ásgrímsson
