Bóluefnið er með neyðarleyfi í Bandaríkjunum og það þarf tvo skammta af því til að fólk teljist full bólusett. Dolsten sagði að með því að gefa þriðja skammtinn sé hægt að bregðast við tveimur þáttum. Annar er að Deltaafbrigðið sækir í sig veðrið í heiminum en þrátt fyrir að bóluefni Pfizer/BioNTech virki vel gegn því þá er aukin hætta á að fólk smitist af Deltaafbrigðinu hálfu ári eftir að það lýkur bólusetningu. Hinn er einmitt að gögn sýna að magn mótefna, þeirra sem hafa verið bólusettir með bóluefninu, minnkar eftir hálft ár og því er aukin hætta á að þeir smitist.
Hann sagði að gögn frá Ísrael og Bretlandi sýni að þrátt fyrir að magn mótefna minnki með tímanum þá dragi bóluefnið samt sem áður úr alvarlegum tilfellum COVID-19 um 95%.
Hann sagði að óbirt gögn úr rannsókn einni sýni að eftir að fólk fær þriðja skammtinn af bóluefninu þrói það með sér fimm til tíu sinnum meira magn mótefna gegn veirunni en eftir skammt númer tvö.
Dolsten sagðist telja sérstaklega mikilvægt að eldra fólk fái þriðja skammtinn.
Í kjölfar ummæla Dolsten sendu bandaríska lyfjastofnunin og bandaríska smitsjúkdómastofnunin frá sér yfirlýsingu þar sem fram kemur að ekki sé þörf á þriðja skammtinum af bóluefnum eins og sakir standa en að yfirvöld séu reiðubúin til að byrja að gefa fólki þriðja skammtinn „ef og þegar rannsóknir sýna að það sé nauðsynlegt“.
