Vísindamenn fundu steingervingana við hlið verkfæra og leifa af hestum, dádýra og villtra nautgripa þegar þeir voru við uppgröft í Nesher Ramla nærri borginni Ramla í miðhluta Ísraels.
The Guardian segir að einn sérfræðingur hafi lýst þessum fundi sem „meiriháttar uppgötvun“. Steingervingarnir eru af tegund sem er blanda af Neanderdalsmönnum og fyrstu nútímamönnunum. Þetta aðskilur hana frá Homo sapiens, nútímamanninum, sem bjó á þessu svæði á sama tíma. Vísindamennirnir hafa ekki viljað segja að um nýja og áður óþekkta tegund manna sé að ræða en þeir telja að þessir menn hafi hugsanlega leikið stórt hlutverk í sögu nútímamannsins.
Elstu leifar Neanderdalsmanna hafa fundist í Evrópu og því hafa margir vísindamenn talið að þeir hafi eingöngu haldið til í Evrópu. Nýlegar rannsóknir hafa þó dregið þetta í efa og ýjað að tilvist óþekktrar og dularfullrar tegundar sem hafi haft áhrif á þróun Neanderdalsmannanna.
Bygging beinanna, sem fundust í Nesher Ramla, er öðruvísi en hjá Neanderdalsmönnum og Homo sapiens, sem fundust í Levant, og hafa vísindamenn því kallað þau Nesher Ramla Homo og telja að þarna geti verið komin tegundin sem hafði mikil áhrif á þróun Neanderdalsmanna.
„Í blöndu við aðrar rannsóknir þá varpar þessi rannsókn skugga á þá einföldu mynd að nútímamenn hafi komið frá Afríku og Neanderdalsmenn hafi búið í Evrópu. Þessi mynd er miklu flóknari en svo,“ sagði Yossi Zaidner, prófessor við the Hebrew University í Jerúsalem og bætti við að hér væru hugsanlega leifar síðustu einstaklinganna af tegund sem átti sinn þátt í þróun Neanderdalsmanna og hafi lifað við hlið nútímamanna. The Guardian skýrir frá þessu.
