24 ára gömul tveggja barna móðir gæti nú þurft að hafa horfast í augu við það að vera með ör fyrir lífstíð eftir að rafsígaretta sprakk framan í andlitið á henni. Segir hún að augnlokið á henni hafi rifnað í tvennt og að dóttir sé hrædd við að sjá mömmu sína með svo áberandi útlitslýti.

Kirby Sheen segist hafa átt sér einskis ills von þegar hún fékk sér rafsígarettuna síðastliðin miðvikudag. „Allt í einu heyrðist hár hvellur og það blossaði upp svartur reykur. Í fyrstu áttaði ég mig ekki á hvað hafði gerst. Ég leit niður á hendurnar á mér sem voru svartar og ég var með stærðarinnar sár á þumalfingrinum,“ segir hún en tveggja ára dóttir hennar varð vitni að atvikinu.

„Þegar ég leit síðan í spegil sá ég að andlitið á mér var þakið blóði. Ég gat aðeins séð með öðru auganu. Dóttir mín öskraði af hræðslu og sagði aftur og aftur: „Mamma er með sár í auganu!“ Ég er hrædd um að hún eigi alltaf eftir að muna eftir þessu,“ segir Kirby jafnframt.

Hún segir að eiginmaður sinn hafi verið í vinnu þegar þetta gerðist og hún hafi því verið ein heima með börnin. Það hafi verið henni til happs að móðir hennar býr skammt frá og leituðu þær mæðgur með hraði á sjúkrahús. Kirby þurfti í kjölfarið að gangast undir lýtaaðgerð sem tók tvær klukkustundir og tjáðu læknar henni að ef sárið hefði verið 1 sentímetra til vinstri þá hefði hún misst sjónina.

Þá hafa þeir tjáð að hún muni að öllum líkindum uppskera stærðarinnar ör eftir slysið og segir Kirby að hún eigi erfitt með að horfa á sjálfa sig í spegli. „Dóttir mín er hrædd við mig og ég neyðist til þess að ganga um með sólgleraugu þessa dagana.“

Þá segir hún það vera á hreinu að hún muni aldrei snerta rafsígarettur framar og hyggst hún leita svara hjá framleiðanda rafsígarettunnar. „Ég vil vekja athygli á þessu svo þetta komi ekki fyrir aftur. Ég myndi ekki óska mínum versta óvini að ganga í gegnum þetta.“