Ansa fréttastofan skýrði frá því í morgun að þrír hafi verið handteknir. Það eru forstjóri fyrirtækisins, sem rekur kláfinn, verkfræðingur hjá fyrirtækinu og daglegur stjórnandi. Hinir handteknu eru grunaðir um „vísvitandi verknað“ að sögn saksóknara. Kláfar fyrirtækisins fara frá bænum Stresa upp á topp Mottarone fjallsins sem er um 1.500 metrar á hæð.
Olimpia Bossi, saksóknari í Verbania segir að hinir handteknu hafi meðvitað átt við öryggiskerfi kláfsins til að koma í veg fyrir seinkanir. Hún segir að til að koma í veg fyrir seinkanir hafi verið settur upp búnaður sem gerði neyðarhemla óvirka en það þýðir að ef vír slitnar þá er ekki hægt að nota neyðarhemla.
Þremenningarnir eru grunaðir um manndráp af gáleysi, að hafa valdið stórslysi og að hafa fjarlægt búnað sem hefði getað komið í veg fyrir manntjón. Saksóknaraembættið hefur lagt hald á upptökur úr eftirlitsmyndavélum vegna rannsóknar málsins. Á þeim sést að sögn að þegar kláfurinn nálgaðist endastöð slitnaði einn vír og þá hrapaði kláfurinn. Margir farþeganna hröpuðu þá út úr honum.
Sá eini sem lifði af var fimm ára drengur en foreldrar hans og yngri systkini létust í slysinu. Talið er að það hafi orðið drengnum til bjargar að faðir hans hafi haldið honum þéttingsfast í fangi sér en faðirinn var sterklega byggður og telja læknar að hann hafi bjargað lífi sonarins með faðmlaginu.
