Heimir Guðjónsson, þjálfari Íslandsmeistara Vals, var í viðtali í sjónvarpsþættinum 433.is sem sýndur var á Hringbraut á mánudaginn.

Íslandsmótið í knattspyrnu hefst á morgun og Valsmenn hafa titil að verja í Pepsi-Max deild karla. Heimir býst við harðri samkeppni um Íslandsmeistaratitilinn í ár.

Hann býst við því að KR-ingar verði sterkari en búist er við. Liðið hefur að hans mati siglt undir radarnum í vetur.

„Ég held að þetta séu svipuð lið en KR-ingarnir verða hrikalega sterkir að því leytinu til að það gekk illa hjá þeim á síðasta tímabili. Þeir komust ekki í Evrópukeppni og þessir menn sem eru þar, reynslumestu mennirnir, Pálmi og Óskar, ég tel að þeir muni ekki láta þetta gerast aftur.“

„Þjálfaranum líður vel, hann er búinn að vera undir radarnum. Ég er búinn að sjá KR-ingana spila og þeir líta vel út. Ég held að þeir verði sterkir.“

Talið er að Breiðablik, undir stjórn Óskars Hrafns Þorvaldssonar, muni veita Valsmönnum mestu samkeppnina um Íslandsmeistaratitilinn í sumar.

„Svo ertu með Blikana, þeir tala þannig sjálfir að þeir ætla sér að vinna titilinn, fleiri en einn og það er jákvætt. Þeir hafa eins og alltaf verið frábærir á undirbúningstímabilinu.“

„Óskar Hrafn er klókur og góður þjálfari. Þeir eru í mjög góðu formi en svo er þetta spurning um andlega þáttinn. Þeir fá alvöru verkefni í fyrsta leik, KR. Þeim leiðist ekkert að spila á móti Blikunum, þeir fá alvöru prófraun í fyrsta leik og það verður fróðlegt að sjá hvort þeir standist það.“

„Svo ertu með Stjönuna og FH sem er með Matta Vill og Steven Lennon frammi, það segir sig sjálft að það er alvöru dæmi.“

Heimir hélt áfram að telja upp lið í deildinni og af hans orðum að dæma er deildin sterkari en á síðasta tímabili. Valsmenn unnu deildina í fyrra með miklum yfirburðum en Heimir segir alltaf erfiðara að verja titilinn heldur en að sækja hann.

„Það er alltaf erfiðara að verja titil heldur en að sækja hann. Þegar að ég kem í Val, hafði liðið endað í 6. sæti og menn voru staðráðnir í að snúa genginu við. Það gerir hlutina auðveldari. Svo vinnst titillinn í fyrra og þá þarf nátturulega að reyna sækja  titilinn aftur og maður þarf að nota þessar tilfinningar sem berjast um í brjóstinu á mönnum. Vilja menn fara aftur til baka til ársins 2019? Eða vilja menn vera á staðnum sem liðið var á árið 2020?“

„Þegar að þú ert í þessari íþrótt og sérð þennan mun þá munu klókir leikmenn átta sig á þessu og þá er góður möguleiki á að halda áfram að vinna leiki. Það er nú samt alltaf þannig að þegar að þú ert meistari þá ertu með liðið sem allir vilja vinna.“

Viðtalið við Heimi og þátt 433.is í heild sinni má sjá hér fyrir neðan: