Real Madrid tók á móti Chelsea í fyrri leik liðanna í undanúrslitum Meistaradeildar Evrópu í gær. Leikurinn endaði með 1-1 jafntefli liðanna.

Chelsea byrjaði leikinn af krafti og átti Timo Werner dauðafæri sem hann klúðraði strax í byrjun leiks. Pulisic braut ísinn fyrir gestina þegar stundarfjórðungur var liðinn af leiknum með flottu marki eftir sendingu frá Rudiger. Eftir markið héldu gestirnir áfram að sækja en það var Benzema sem jafnaði metin eftir hálftíma leik þvert gegn gangi leiksins. Síðari leikurinn eftir viku fer svo fram á Englandi.

Timo Werner framherji Chelsea fékk dauðafæri í leiknum til þess að skora en hann hefur ekki verið heitur fyrir framan markið. Werner hefur klúðrað dauðafærum reglulega.

„Hann klúðraði svakalegur færi gegn West Ham og aftur hérna í þessum leik, það hjálpar auðvitað ekki,“ sagði Thomas Tuchel þjálfari Chelsea eftir leikinn.

Hann vonar að Werner fari ekki að vorkenna sjálfum sér. „Það hjálpar samt ekkert að grenja yfir þessu eða sjá eftir þessu mjög lengi.“

„Svona er staðan, það eru milljónir manna sem eru í verri stöðu og að eiga við erfiðari mál. Það er öllum sama um þetta á morgun.“