Fréttablaðið skýrir frá þessu í dag. „Þetta eru mjög jákvæðar niðurstöður og þær sýna að Ísland er samkeppnishæfur áfangastaður miðað við önnur lönd,“ hefur blaðið eftir Daða Guðjónssyni, fagstjóra neytendamarkaðssetningar hjá Íslandsstofu. Hann sagði að það þurfi þó að hafa í huga að fólk sé fljótt að gleyma og af þeim sökum sé mikilvægt að viðhalda Íslandi sem áfangastað í huga ferðamanna þar til og eftir að þeir byrja að ferðast á nýjan leik.
Það var Maskína sem framkvæmdi könnunina fyrir Íslandsstofu í febrúar. Hún náði til ferðamanna í Bandaríkjunum, Bretlandi, Danmörku, Kanada, Þýskalandi og Svíþjóð. Svarendur voru á aldrinum 25 til 65 ára.
„Þess má geta að þegar könnunin var framkvæmd voru ekki komnar fréttir um eldgosið, áform um að bólusettir ættu greiða leið inn í landið og Húsavík hafði ekki verið tilnefnd til Óskarsverðlauna. Þetta eru allt hlutir sem vinna með okkur,“ er haft eftir Daða sem sagði að frá því að könnunin var framkvæmd hafi leitarniðurstöðum, sem tengjast Íslandi, fjölgað um helming og því megi leiða líkur að því að ferðaviljinn sé meiri en niðurstöður könnunarinnar sýna.
