Meðal þeirra sem telja að hamingjan endist ekki að eilífu er Lady Colin Campbell sem hefur meðal annars skrifað bókina „Meghan & Harry: The Real Story“. Í viðtali við PageSix dró hún ekki dul á skoðun sína á framtíð hjónanna. Hún á ekki von á að hjónabandið verði langlíft. „Harry og hún verða ekki lengi saman. Um leið og hún varð hertogaynja af Sussex byrjuðu höfuð að fjúka,“ sagði Campbell og hélt áfram: „Hún hefur algjörlega misst tengslin við raunveruleikann. Hún froðufellir þegar nafn mitt er nefnt en hún getur ekkert gert því ég geri ekkert rangt út frá lagalegu sjónarmiði,“ sagði Campbell sem er að sögn sérfræðingur í málefnum konungsfjölskyldunnar.
Hún sagði jafnframt að Meghan sé illa þokkuð í öllu Breska samveldinu og að ekki hafi dregið úr hatrinu eftir viðtal hjónanna við Oprah Winfrey nýlega.
„Hún gat ekki haldið kjafti. Harry féllst á viðtalið því hann vissi að sumt væri ekki hægt að staðfesta. Hann var ekki ánægður með þetta því hann vissi að þetta var ekki satt. Þau giftu sig ekki þremur dögum fyrir stóra brúðkaupið. Það er munurinn á staðreyndum og skáldskap,“ sagði Campbell.
Hún ræddi einnig um möguleika Harry á að snúa aftur til eðlilegs lífs ef til skilnaðar kemur og sagði að hann ætti ekki nokkurn möguleika á því. „Óháð því hversu ósátt þau eru þá sér hirðin um málin. Þau bíða þar til það er búið að ná stjórn á ástandinu. Nú er það virðing og kurteisi sem stýrir þessu. Hún hefur valið Bandaríkin, fasteign þar og tvö börn. Hún hefur hann. Það er erfitt fyrir hann að sleppa, hann er fangi.“
