Í fréttatilkynningu frá Kaupmannahafnarháskóla segir að þessi uppgötvun geti sagt okkur eitt og annað um loftslagið á Grænlandi áður fyrr og veitt vísbendingu um hvernig framtíð jökulsins lítur út.
Jótlandspósturinn hefur eftir Dorthe Dahl–Jensen, sem kom að málinu ásamt vísindamönnum frá Belgíu og Bandaríkjunum, að það sé mjög merkilegt að hafa fundið þessa steingervinga í borkjörnum úr jöklinum. Þetta sé í fyrsta sinn sem heilir plöntusteingervingar, undan jöklinum, finnist.
Ískjarnarnir eru fengnir með því að bora, með bor sem er um 10 sm í þvermál, niður í ís. Þeim mun dýpra sem er borað, þeim mun eldri ís fæst. Þessa ískjarna er hægt að nota til að auka þekkingu okkar á Grænlandsjökli og þeirri þróun sem hefur átt sér stað.
„Þegar við skoðum ískjarnana sjáum við steingerð lauf og greinar og það sýnir að gróður hefur vaxið á Grænlandi áður en ísinn lagðist yfir. Þetta veitir okkur möguleika á að kortleggja hversu hlýtt var áður en ísinn lagðist yfir og ekki síður að öðlast skilning á hvað gat vaxið þar,“ sagði Dahl–Jensen.
Umræddir ískjarnar voru fengnir með borunum 1994 en hafa verið í geymslu hjá Kaupmannahafnarháskóla síðan. Beðið var eftir því að tæknin yrði orðin nógu góð til að hægt væri að rannsaka þá. Að auki gleymdust þeir eiginlega en komu í ljós 2017 þegar verið var að flytja.
Með því að mæla vatnsísótópa er hægt að slá því föstu að jökullinn hefur þakið Grænland í eina milljón ára að sögn Dahl–Jensen.
Steingervingarnir geta einnig varpað ljósi á hvernig framtíð jökulsins verður. „Við getum sagt að það þarf mjög hlýtt loftslag til að ísinn bráðni. Það er örlítið róandi, að því leytinu, að hann hverfur ekki á næstu 100 árum og raunar ekki á næstu 100.000 árum,“ sagði Dahl–Jensen.
