Bílar, sem nota jarðefnaeldsneyti, eru ekki nærri því eins umhverfisvænir og rafbílar. Þetta eru niðurstöður nýrrar rannsóknar en þær styrkja þann málstað að það sé til mikilla hagsbóta fyrir umhverfið að skipta bensín- og díselbílum út fyrir rafbíla.

The Guardian skýrir frá þessu. Fram kemur að bensín- og dísilbílar þurfi miklu meira hráefni en rafbílar á líftíma sínum. Á líftíma liþíumrafhlöðu, sem er notuð í rafbíl, fara um 30 kíló af hráefnum til spillis þegar búið er að taka endurvinnslu með í reikninginn. Hvað varðar bensín- og dísilbíla þá fara 17.000 lítrar af olíu til spillis á líftíma bílanna.

Þessar niðurstöður eru byggðar á greiningu Transport & Environment (T&E). The Guardian segir að hlutfallslegur útreikningur á því hráefni sem þurfi til að búa til bíla sýni að bensín- og dísilbílar krefjist að minnsta kosti 300 sinnum meira hráefnis en rafbílar.

Framleiðsla rafbíla kallar á meiri vinnslu ákveðinna málma, til dæmis liþíums og kóbalts. T&E segir að áhrif olíuvinnslu, sem er notuð í eldsneyti, séu meiri en áhrif málmvinnslunnar.