Hinn brasilíski Arthur, er liðsfélagi Cristiano Ronaldo hjá Juventus. Ronaldo gerir miklar kröfur á sjálfan sig og liðsfélaga sína, þess vegna er hann einn besti knattspyrnumaður sögunnar.

Arthur hefur nú greint frá því hvernig Ronaldo hefur hjálpað honum innan vallar og utan til þess að bæta sína frammistöðu.

„Hann æfir eins og skepna, hann veit ekki hvenær hann á að hvíla og hvetur mann áfram til þess að gefa allt sitt í æfingarnar. Hann segir mér meira að segja hvað ég eigi að borða,“ sagði Arthur í viðtali.

Fleiri sögur hafa komið upp á yfirborðið um það hvernig sé að vera liðsfélagi Ronaldo. Patrice Evra, liðsfélagi hans hjá Manchester United á sínum tíma sagði frá því þegar Ronaldo bauð honum heim til sín eftir æfingu.

„Ég fór til hans og var mjög þreyttur eftir æfinguna. Á eldhúsborðinu heima hjá honum var salat, hreinn kjúklingur og vatn. Við byrjuðum að borða og ég var alltaf að búast við því að í kjölfarið kæmi einhver steik en það kom ekki neitt,“ sagði Evra.

Eftir máltíðina hafi Ronaldo staðið upp og byrjað að halda bolta á lofti. Hann bað Evra um að taka þátt í þessu með sér og við tóku alls konar æfingar.

„Þess vegna segi ég við alla, ef Cristiano Ronaldo býður þér heim til sín, ekki fara. Segðu bara nei því hann er vél, hann hættir ekki að æfa,“ sagði Evra um Cristiano Ronaldo.