Þetta sagði Jen Psaki, fjölmiðlafulltrúi Hvíta hússins, á fréttamannafundi í gærkvöldi, þeim fyrsta eftir að Biden tók við embætti.
„Þegar forsetinn bað mig um að taka þetta starf að mér ræddum við um mikilvægi þess að koma aftur með sannleika og gagnsæi hingað í fundaraðstöðuna,“ sagði hún. Hún sagði einnig að það muni koma tímar þar sem ósætti kemur upp á fréttamannafundunum og það „er í lagi. Það er partur af lýðræðinu,“ sagði hún.
Hvíta húsið ætlar einnig að taka aftur upp reglulega stöðufundi um kórónuveirufaraldurinn og Psaki mun mæta á fréttamannafundi alla virka daga. „Ég er ekki skrímsli,“ sagði hún.
Áður en Donald Trump var kjörinn forseti var venjan að daglegir fréttamannafundir færu fram í Hvíta húsinu en það breyttist í tíð Trump og þeir voru haldnir óreglulega og um hríð féllu þeir alveg niður.
Stephanie Grisham, ein af fjórum fjölmiðlafulltrúum Hvíta hússins í valdatíð Trump, hélt til dæmis ekki einn einasta fréttamannafundi á þeim tíu mánuðum sem hún gegndi embættinu.
Trump og stjórn hans voru oft gagnrýnd fyrir að segja ósatt og setja fram staðlausar fullyrðingar. Oft kom til deilna á milli fréttamanna og talsmanna Trump og fjölmiðlar á borð við CNN og The New York Times urðu að lokum opinberlega andstæðingar Trump.
