Jón Þór Ólafsson, þingmaður Pírata, mun ekki gefa kost á sér til áframhaldandi þingsetu í komandi kosningum. Þetta kemur fram í grein sem hann birti hjá Vísi sem og í tilkynningu sem send hefur verið á fjölmiðla.

Jón Þór bendir á að í dag opnar fyrir skráningu í prófkjör Pírata fyrir kosningarnar. Það sé kjörið tækifæri fyrir þá sem brenna fyrir málefnum Pírata að láta til sín taka.

„Markmið mitt var alltaf tryggja sjálfbærni Pírata, og í dag er hreyfingin sterkari en nokkru sinni fyrr. Það er mikill meðbyr með flokknum, grasrótin er öflug, starfsfólkið okkar er afburðahæft, þingflokkurinn hefur aldrei verið samheldnari og þau sem bjóða sig fram aftur kunna til verka. Píratar eru því svo sannarlega sjálfbærir og þar sem ég er ekki lengur nauðsynlegur í framlínuna mun ég aftur leita í friðinn utan þingsins í stað þess að leita endurkjörs. Fyrir þau sem stefna á framboð segi ég að þingstarfið er það skemmtilegasta sem ég hef gert.“

Jón Þór ætlar að færa sig yfir í grasrótina og styðja svo nýja þingmenn, en rannsókn hafi sýnt fram á að þingmenn séu yfirleitt lengi að læra á starfið sem sé sóun.

„Sóun á tíma, peningum og starfskröftum. Og umfram allt sóun á tækifærum til að vinna að framgöngu stefnumála Pírata.“

Jón Þór er þriðji þingmaður Pírata sem tilkynnir að hann muni ekki gefa kost á sér í kosningunum í ár en áður höfðu Helgi Hrafn Gunnarsson og Smári McCarthy tilkynnt að þeir sækist ekki eftir endurkjöri.