Árið 1993 komst John Wayne Bobbitt í heimsfréttirnar eftir að eiginkona hans, Lorena, skar getnaðarlim hans af honum með eldhúshníf á meðan hann svaf. Hún flúði síðan frá heimili þeirra í bíl og hafði liminn með. Honum henti hún síðan út um bílgluggann. Limurinn fannst og læknum tókst að græða hann á John. Ástæðan fyrir þessum verknaði Lorena var að hún hafði fengið sig fullsadda af því ofbeldi sem John beitti hana. Þetta kvöld hafði hann nauðgað henni og það var dropinn sem fyllti mælinn. Nú er John enn á ný í vandræðum.

Í samtali við TMZ sagði John að hann hafi stigið á nagla þegar hann var við byggingaframkvæmdir fyrir sjö árum. Naglinn fór í gegnum skóinn og í tá á vinstri fæti. Nokkrum mánuðum síðar áttaði hann sig á að sýking var komin í sárið. Læknar á tveimur sjúkrahúsum náðu ekki að leysa málið að fullu og í ljós kom að sýking var komin í bein.

Sárið hefur aldrei náð að gróa að fullu þrátt fyrir að hann hafi verið settur á mikla sýklalyfjakúra og nú er John enn einu sinni kominn á sjúkrahús út af fætinum sem lítur ekki vel út. Á vef TMZ er hægt að sjá myndir af honum.

John sagði að beinið væri svo illa farið að læknar íhugi nú að taka fótinn af. Það bætist þá við að á síðasta ári var tá á hægri fæti hans tekin af vegna sýkingar.