Erpur Eyvindarson rappari er gestur í nýjasta podcasti Sölva Tryggvasonar. Í viðtalinu við Sölva segir Erpur sögur af því þegar hann fór til Tyrklands til að hitta Halim Al. En eins og þekkt er stóð yfir hatrömm deila milli hans og Sophiu Hansen barnsmóður hans svo árum skipti eftir að Halim Al fór með dætur þeirra til Tyrklands.
,,Johnny Nas fór til að bjarga börnunum og þetta var alveg svakalegt. Ástandið í Tyrklandi er aðeins öðruvísi núna en þegar við fórum….þegar ég sagði fólki að ég væri að fara að hitta Halim Al úti í rassgati var mér sagt að ég kæmist ekki upp með hvað sem er í Austur-Tyrklandi,” segir Erpur, en hann og félagar hans flugu til borgarinnar Batman í Austur-Tyrklandi og keyrðu þaðan um litla bæi í sveitum Tyrklands áður en þeir náðu loks að finna Halim Al.
,,Svo fórum við þarna og hittum Halim og hann var með sítt skegg og klæddur í þvílíkan búning, einhverja mussu og geggjað kaskeiti…Ég var kominn með aflitað hár og var svona hálf feitur í þröngum fötum og það fyrsta sem hann sagði þegar hann hitti mig var: ,,Ert þú úr Keflavík?”….síðan bara hentum við okkur í viðtalið og ég reyndi að kaupa dæturnar til baka,” segir Erpur.
Hann segir í viðtalinu líka frá því þegar hann var í Asíu í janúar, þegar Covid faraldurinn fór á fullt þar og segist hafa upplifað það að í Asíu væri fólk betur undir svona faraldur búið en í Evrópu.
,,Ég fór á einhverjar eyjur í Suður-Kínahafi og fann mér einhverjar fjögurra metra langar eðlur og fór að stunda samskipti við þær….Við vorum í Hong Kong, en þetta er ekkert nýtt fyrir Asíu. Þetta er svo nýtt allt fyrir okkur. Ég bjó í Shanghai á sínum tíma og það eru alltaf allir með grímur.”
Hann og vinir hans lentu þó í smá vandræðum með að komast heim, en það tókst að endingu.
,,Það þurfti að mixa…það var búið að loka á ýmsar flugleiðir og við þurftum að fljúga í gegnum Peking og þar vorum við hlæjandi að því að mega ekki fara inn á veitingastaði nema með grímur og látnir sitja 2 metra frá næsta borði…en svo bara korteri seinna eru Vesturlönd komin í sama.”
Í viðtalinu fara Erpur og Sölvi um víðan völl og ræða meðal annars Johnny Naz tímabilið, frumkvöðlana í rappinu, stjórnmálin, partýin og margt margt fleira
Viðtal Sölva við Erp má sjá hér:
https://www.youtube.com/watch?v=A6zYUVn0s78&t=5s
