Almannavarnir héldu blaðamannafund í ráðherrabústaðnum við Tjarnargötu nú kl 16:00. Kom fram á fundinum að þrátt fyrir fjölgun COVID-19 tilfella hér á landi undanfarna daga væri ekki tilefni til að auka viðbúnaðarstig almannavarna að svo stöddu.
DV fjallaði í gær um leikmann Breiðabliks sem greindist með COVID-19 eftir að hafa komið heim að utan. Gekkst konan undir sýnatöku við heimkomu og greindist ekki veira í sýninu. Konan gekkst svo undir aðra sýnatöku þegar fólk sem hún hafði umgengist erlendis greindist jákvætt fyrir COVID-19. Það sýni reyndist svo jákvætt. Eitthver styr hefur staðið um áreiðanleika COVID-19 prófanna í Leifsstöð í kjölfar þessa og eðlilegt að einhverjir kunni að spyrja hvort sýnatökur á komufarþegum í Leifsstöð veiti falskt öryggi. Kári Stefánsson svaraði þeim spurningum þegar hann sagði prófið gallað á einn megin hátt. Það eigi í erfiðleikum með að greina einstakling rétt sem er nýsmitaður.
Katrín Jakobsdóttir forsætisráðherra sagði að hún væri engu að síður sannfærð um að leiðin sem verið væri að fara í opnun landsins væri góð.
Vakti Þórólfur athygli á því að aðeins fimm einstaklingar hafi greinst jákvæðir fyrir veirunni af 12 þúsund komufarþegum en að eitt þessara mála hafi hrundið einu stærsta rakningarmáli smitrakningateymisins af stað. Var það Íslendingur. Mest smithætta sé af Íslendingum enda tengslanet þeirra hér á landi þéttara og viðbúið að þau eyði meiri tíma með fleirum en ferðamenn. Hvatti Þórólfur Íslendinga á heimleið að gæta vel að sóttvörnum, jafnvel þó COVID próf sé neikvætt við komuna til landsins.
Þórólfur vakti ennfremur athygli á því að hægt væri að auka skimun við landamærin og að hámarks afköst Íslenskrar erfðagreiningar væri mun meiri en nú væri verið að vinna með.
Víðir lauk máli sínu á að benda á að ekki hafi verið hægt að gera ráðstafnir til að heimila fólki í sóttkví að taka þátt í forsetakosningunum á morgun. Því er ljóst að þeir 180 einstaklingar sem nú eru í sóttkví og þeir 9 einstaklingar sem eru í einangrun með virk smit munu ekki geta kosið í forsetakosningunum sem fram fara á morgun, 27. júní.
