Varaformaður Miðflokksins, Snorri Másson, segist ekki tala fyrir því að Ísland gangi úr EES-samstarfinu. Þetta kemur fram í ræðu þingmannsins á Alþingi í dag.
Töldu margir að Snorri væri að tala fyrir því að Ísland gengi úr EES í gær, en þá sagði hann í ræðu:
„Svo er EES-samstarfið sem ráðherrann neitar því miður að taka til umræðu í sambandi við innflytjendamálin. Það er auðvitað stóra breytan í innflytjendamálum hér að hér eru opin landamæri fyrir 450 milljónir manna. Ég segi í því sambandi að ef útlendingum heldur áfram að fjölga á Íslandi tvöfalt hraðar en Íslendingum þá tel ég í fyrsta lagi að við þurfum að beita okkar neyðarheimildunum innan EES-samningsins til að taka stjórn á fólksflutningum hingað til lands. Við höfum þær heimildir, við gætum það. Ef það virkar ekki, ef við hreinlega missum stjórn á eigin lýðfræðilegu örlögum, þá tel ég að hagsmunum okkar sé augljóslega betur borgið utan samstarfsins ef þetta heldur svona áfram mikið lengur. Í því sambandi þá held ég líka að Alþingi ætti hreinlega að skoða tillögu sem er t.d. til umræðu í Sviss um að takmarka íbúafjöldann í landinu. Það er verið að ræða það í Sviss og nýtur vel að merkja mikils stuðnings meðal almennings.“
Hann sagði svo í annarri ræðu: „Forsenda velmegunar er sagt um EES-samninginn. Jú, það má væntanlega til sanns vegar færa á ýmsum sviðum. En hvaða velmegun er það nákvæmlega ef íslenskar fjölskyldur eru hættar að vilja fjölga sér?“
Fjölmiðlar gerðu sér mat úr ummælunum og fyrrum utanríkisráðherra, Þórdís Kolbrún Reykfjörð Gylfadóttir, skrifaði færslu á Facebook þar sem hún fagnaði því að Miðflokkurinn hefði loksins sagt það sem hann er raunverulega að hugsa.
Snorri steig aftur upp í pontu Alþingis í dag til að skýra ummæli sín frekar og koma því skýrt á framfæri að hann sé ekki að tala fyrir úrsögn úr EES.
„Það er enginn að tala fyrir því að ganga út úr EES-samstarfinu, en við erum að tala fyrir því að meta framtíðarhagsmuni íslensku þjóðarinnar,“ sagði Snorri og gerði athugasemd við að ekki megi ræða um hagsmuni íslensks almennings gagnvart þróun í innflytjendamálum án þess að fá á móti hræðsluáróður um að til standi að fórna EES-samstarfinu.
„Ég hef sagt að innflytjendum hafi fjölgað of hratt og ég talaði fyrir því hér í þinginu í gær að ef þetta héldi svona áfram þyrftum við auðvitað að skoða það hvort við beittum okkar sérstöku ákvæðum, sem við börðumst fyrir innan EES-samningsins, til að ná stjórn á þeirri þróun. Og svo sagði ég að ef mönnum leyfðist það ekki og innflytjendum væri að fjölga hér, til framtíðar og áratugum saman, mun hraðar, meira en tvöfalt hraðar, en Íslendingum, þá kynni að koma til þess að við myndum meta málið þannig að hagsmunum okkar væri betur borgið utan bandalags sem neyðir okkur inn í slíka þróun. Auðvitað segi ég það fullum fetum.“
