Umhverfis- og framkvæmdaráð Hafnarfjarðar hefur hafnað beiðni Hestamannafélagsins Sörla um aðgengi hestamanna að Hvaleyrarvatni og stígum þar í kring.

Hestamönnum verður þar af leiðandi meinað að fara á hestum sínum að vatninu og á stígana þar nærri. Byggir ráðið synjunina á umsögn Heilbrigðiseftirlits Garðabæjar, Hafnarfjarðar, Kópavogs, Mosfellsbæjar, Seltjarnarnes.

Miðað við beiðnina virðist þó slíkt bann hafa verið í gildi og ekki verður þá breyting á því.

Í umsögn Heilbrigðiseftirlitsins segir meðal annars að umhverfi Hvaleyrarvatns sé viðkvæmt og vatnið frekar snautt og vatnsskipti fremur hæg og sé hætta á að umferð hesta geti raskað viðkvæmum gróðri á bökkum og botngróðri, sem sé mikilvægur veiðistaður fugla.

Þá sé hætta á að hestar losi upp botnset sem valdi gruggi sem hafi slæm áhrif á ljósskilyrði fyrir þörunga og annan botngróður. Aukin umferð hesta í og við vatnið geti haft þær afleiðingar að hrossatað hafi áhrif á næringarefni í vatninu sem geti leitt til ofauðgunar og þannig haft áhrif á afkomu annarra dýrategunda svo sem fiska og fugla.

Vatnið sé lítið og fiskistofnar háðir seiðasleppingu og sé afkoma þeirra því mjög viðkvæm fyrir breytingum á vatnsgæðum. Þá sé Hvaleyrarvatn eitt helsta fuglasvæði í landi Hafnarfjarðar, og megi þar finna bæði vatna- og votlendisfugla auk þess sem öflug skógrækt við vatnið hafi dregið að nýjar tegundir spörfugla.

Heilbrigðiseftirlitið segir það sitt mat að æskilegt sé að takmarka aðgengi hesta að Hvaleyrarvatni eins og mögulegt sé með hliðsjón af umhverfisþáttum og þeirrar einstöku náttúru sem þar sé að finna. Þá skapi umferð hestamanna hættu ef slík umferð sé of nálægt skipulögðum svæðum þar sem börn og unglingar séu að leik. Það sé því skynsamlegt að reiðstígar séu í nokkurri fjarlægð frá vatninu og frá þeim svæðum sem séu í skipulagðri skógrækt og annarri útivist.