Skúli Mogensen, fyrrverandi forstjóri WOW air, setti glæsihýsi sitt við Hrólfsskálavör 2 á Seltjarnanesi á sölu í fyrra. Var það auglýst á Oceanvillaiceland.com, en síðan virtist hafa verið eingöngu gerð til að selja húsið.
Morgunblaðið greinir frá því í dag að húsið sé komið á sölu hjá Fasteignasölunni Eignamiðlun, en þar er fasteignamatið sagt rúmar 192 milljónir króna og brunabótamatið um 241 milljón.
Stundin greindi frá því í desember 2018 að Skúli hafi veðsett húsið á tæplega 360 milljónir.
Óskað er eftir tilboðum í húsið sem er um 609 fermetrar með tíu herbergjum og var byggt árið 2008.
Fókus fjallaði um húsið í fyrra og mátti sjá á myndum að engu var til sparað við húsið, sem er allt hið glæsilegasta.
