Bjarni Benediktsson, fjármálaráðherra, hefur varið ákvörðun fjármálaráðuneytisins að mæla gegn Þorvaldi Gylfasyni, hagfræðiprófessors, í starf ritstjóra fræðiritsins Nordic Economic Policy Review. Helga Vala Helgadóttir, þingmaður Samfylkingarinnar, gefur lítið fyrir skýringar Bjarna og sakar hann um valdníðslu.

„Bjarni Benediktsson hefur nú tjáð sig um sitt faglega meinsæri (Berufsverbot) gagnvart Þorvaldi Gylfasyni. Hann segist að sjálfsögðu bera ábyrgð á því að ráðning Þorvaldar Gylfasonar hagfræðiprófessors í stöðu ritstjóra norræns hagfræðitímarits var afturkölluð, enda starfsmenn ráðuneytis í umboði og á ábyrgð ráðherra. En hann segir fleira. Hann segir að hann hafi verið afar skýr með að ráðning ÞG [Þorvalds Gylfasonar] kæmi ekki til greina enda telji hann að sýn og áherslur ÞG í efnahagsmálum geti engan veginn „stutt við stefnumótun ráðuneytis sem hann stýri“. Þá klikkir hann út með að ÞG hafi ekkert notið stuðnings allra ríkja, en minnist ekki orði á þá undrun sem barst út meðal fulltrúa annarra ríkja þegar fjármálaráðuneytið íslenska greip inn í ráðninguna með þessum hætti.“

Helga Vala segir að þetta hafi þó ekki komið henni á óvart og segir það undarlegt að tala um að fræðirit þurfi að styðja við stefnumótun fjármálaráðuneytisins á Íslandi þegar um samnorrænt rit er að ræða. 

„Nei, Bjarni, valdníðsla ykkar sjálfstæðismanna kemur mér ekkert á óvart en mig langar þó að benda á fáeina hluti: Þetta fræðirit er ekki gefið út til að styðja við stefnumótun fjármálaráðuneytisins á Íslandi heldur fagrit til upplýsinga – óháð stjórnmálaflokkum og þeirra afskiptum. Ég átta mig á því að það er þér og ykkur í Sjálfstæðisflokknum framandi, en það tíðkast víða um heim að óháð fagrit séu gefin út, ekki til að þóknast hagsmunaöflum heldur til faglegrar upplýsingar.“

Helga gengur enn lengra og sakar Sjálfstæðisflokkinn um einræðistilburði.