Karlmaður í Rimahverfi, sem býr á jarðhæð fyrir framan leikvöll, berar sig ítrekað fyrir börnum sem eru þar að leik. Foreldrar barna, sem maðurinn hefur berað sig fyrir, segjast ráðalaus vegna málsins og forkastanlegt að ekki sé hægt að grípa inn í aðstæður með einhverjum hætti. Þetta kom fram í kvöldfréttum Stöðvar 2 og Bylgjunnar.
DV greindi frá málinu í gær þar sem rætt var við fjölskylduföður í Rimahverfi sem greindi frá því að eiginkona hans hefði orðið vitni að manninum að bera sig. Þar kom fram að maðurinn hafi áður hlotið dóm fyrir blygðunarsemisbrot af þessu tagi, raunar þrisvar: árið 2011, 2013 og 2014.
Í frétt Stöðvar 2 kemur fram að margir hafi tilkynnt athæfi mannsins til lögreglu upp á síðkastið. Nú síðast á föstudaginn er hann beraði sig á meðan þriggja ára barn var að leik á leikvellinum. Faðir barnsins tilkynnti athæfið umsvifalaust til lögreglu.
Eins kom fram að maðurinn hafi berað sig fyrir tveimur 9 ára drengjum í lok síðasta árs. Athæfið var kært til lögreglu og var skýrsla tekin af drengjunum í Barnahúsi. Drengirnir hafa upplifað mikla vanlíðan vegna málsins.
Móðir annars drengsins sagði í samtali við Stöð 2: „Hegðun hans breyttist í skólanum. Það var haft samband við mig og ég var spurð hvort eitthvað hefði gerst.“ Móðirin greindi frá því að drengirnir treystu sér ekki til að fara einir í skólann og vildu alls ekki ganga framhjá húsinu þar sem maðurinn býr. „Mér finnst bara ekki boðlegt að börnin hér í hverfinu geti ekki farið í sakleysi sínu að leika sér á leikvöll án þess að lenda í einhverju svona atviki.“
Foreldrar gagnrýna að ekkert virðist hægt að gera í þessu máli. Það sé með öllu forkastanlegt að bjóða börnum upp á þessar aðstæður án þess að nokkuð sé gert í málunum.
