Kona sem rekin var úr starfi sínu í Landsbankanum eftir atvik í starfsmannasamkvæmi höfðaði mál á hendur bankanum fyrir meinta ólöglega uppsögn. Konan þótti standa sig mjög vel í starfi en mjög bar á samstarfserfiðleikum milli hennar og annars manns. Þó að viðurkennt sé að konunni hafi ekki verið einni um samstarfserfiðleikana að kenna tapaði hún málinu bæði fyrir Héraðsdómi á sínum tíma og fyrir Landsrétti nú rétt fyrir helgi.

Konan krafðist skaða- og miskabóta þar sem uppsögnin hefði verið ólögmæt og meiðandi í hennar garð. Bótakrafan hljóðaði upp á tæpar 10 milljónir króna. Dómur var kveðinn upp í Héraðsdómi Reykjavíkur í desember árið 2018. Þar var Landsbankinn sýknaður af kröfum konunnar og henni gert að greiða 650.000 kr. í málskostnað. Landsréttur staðfesti dóminn á föstudag fyrir utan að hann felldi niður málskostnað.

Hvað gerðist í starfsmannasamkvæminu?

Uppsögn á konunnar átti sér nokkurn aðdraganda en vorið 2016 munu hafa orðið hnökrar í samskiptum hennar og starfsmanns deildarinnar sem hún stýrði og kom málið til kasta skrifstofu mannauðsdeildar. Um haustið lagði starfsmaðurinn fram kvörtun um meint einelti konunar í sinn garð.

Eftir að niðurstaða athugunar mannauðsdeildarinnar lá fyrir lét maðurinn sem kvartaði undan konunni af störfum.

Atvik sem varð í starfsmannasamkvæmi á starfsstöð konunnar varð til þess að bankinn ákvað að segja henni upp störfum. Ekki kemur fram í texta dómsins hvað nákvæmlega gerðist í samkvæminu annað en að konan hafi þar átt í hvössum orðaskiptum við tiltekna starfsmenn. Í kjölfarið var hún boðuð á fund mannauðsstjóra og framkvæmdastjóra síns og afhent uppsagnarbréf.

Í dómi Landsréttar segir að samskiptaerfiðleikar á starfsstöðinni hafi ekki verið konunni einni að kenna. Hins vegar hafi Landsbankanum verið heimilt að segja upp konunni til að leysa þann samskiptavanda sem kominn var upp. Segir í dómnum að samkvæmt vinnurétti hafi atvinnurekendur á almennum markaði umtalsvert svigrúm til að segja starfsmönnum upp störfum, að því gefnu að réttilega sé staðið að uppsögn og í samræmi við lög, kjarasamninga eða ráðningarsamninga eftir því sem við á.