Kristinn Tómasson, fyrrverandi framherji Fylkis, er í skemmtilegu spjalli við Jóhann Skúla í Draumaliðinu þar sem hann velur bestu samherjana af ferlinum. Kristinn var öflugur framherji og er goðsögn í Lautinni í Árbænum.

Hann segir frá því þegar hann hljóp stífluhringinn sem er fyrir neðan félagsheimili Fylkis, allt fyrir fría ferð til útlanda. „Það var eftir eina æfinguna, þá var ég að fara í nýja takkaskó og fer í þeim í sturtu til að mýkja þá upp. Fer í Fylkis sokka og takkaskóm í sturtu, þar eru þeir nokkrir saman í sturtunni og þeir hlæja þegar ég kem inn. Ekki alveg standard búnaður í sturtu,“ sagði Kristinn þegar hann hóf að rifja upp þetta ótrúlega hlaup.

Nokkrir samherjar hans fóru að bjóða honum kassa af bjór fyrir það að rölta svona út úr klefanum en Sverrir Sverrisson samherji hans gekk skrefinu lengra.

,,Þar byrja veðmál og verið að mana mig í að gera hluti, tveir af þeim bjóða mér bjórkassa ef ég fer svona út. Sverrir á góðum launum sem spilandi aðstoðarþjálfari og hann tekur þetta ennþá lengra. ´Ef þú hleypur stífluhringinn þá borga ég fyrir þig til Kýpur´ sagði Sverrir.“

Kristinn ákvað að skoða aðstæður áður en hann hljóp af stað og taldi ekki marga vera á ferli.

„Þetta eru kannski 3 kílómetrar, ég fer út í gættina. Klukkan var svona 19:30, sól og flott veður í dalnum. Ég horfi út eftir og sé ekki marga á ferðinni, ég legg af stað. Bara á takkaskónum, ég er kominn niður fyrir þar sem gervigrasið er fyrir neðan. Kem fyrir hornið og þar mæti ég 20-30 manna skokkhópi. Ég held áfram og tek fram úr fólki sem er í göngutúr, fólk sem fer annað og mætir mér ekki. Ég hljóp hringinn örugglega á mettíma. Ég kem til baka, þá er ný búinn leikur í old boys og konur þeirra og allir eru eru þar. Þar bíða svona 100 manns sem bíða fyrir utan klefann, ég hleyp í gegn og inn í klefa. Eins og ekkert sé eðlilegra.“

Þegar kom að skuldardögumm þá stóð Sverrir við sitt. „Svo fórum við út í október, hann stóð við sitt.“