Þetta hélt þó ekki aftur af Obama þegar hann ræddi um faraldurinn og viðbrögð ríkisstjórnar Donald Trump við honum á símafundi með Obama Alumni Association sem eru samtök fyrrum starfsmanna Obama og stuðningsfólks hans.
Bandarískir fjölmiðlar komust fljótt yfir upptökur af fundinum og skýrðu frá ummælum Obama. Þetta vakti að vonum litla hrifningu í herbúðum Donald Trump og stuðningsmanna hans sem hafa látið Obama heyra það óþvegið síðustu daga.
Á Team Trump Online fundi kosningaherferðar Trump í gær, fundir sem eru sendir út á YouTube og Facebook, lét Mitch McConnell, áhrifamaður innan repúblikanaflokksins og leiðtogi öldungadeildar þingsins, Obama heyra það.
„Mér finnst að Obama forseti eigi að þegja. Við vitum að honum líkar ekki það sem þessi ríkisstjórn gerir, það er skiljanlegt. En í hreinskilni sagt þá finnst mér það ósmekklegt að gagnrýna þá ríkisstjórn sem tekur við af þinni.“
Sagði McConnell og benti á að George W. Bush og faðir hans, George Bush, hefðu sleppt því að gagnrýna eftirmenn sína úr röðum demókrata.
„Þú hafði tækifæri, þú varst þarna í átta ár. Mér finnst þessi hefð, sem Bush hratt af stað, góð.“
Það er Lara Trump, tengdadóttir Donald Trump sem stýrir þessum þáttum. McConnell sagði í samtali við hana í gær að Obama og stjórn hans ættu að hluta sök á heimsfaraldrinum og hversu illa hefði gengið að takast á við hann í Bandaríkjunum. Stjórn hans hefði ekki skilið neitt eftir fyrir núverandi ríkisstjórn til að takast á við faraldurinn.
Trump hefur heldur ekki dregið af sér í að gagnrýna Obama eftir ummæli hans og skrifaði um 100 færslur á Twitter á sunnudag og mánudag. Hann sakaði Obama um eitt og annað í þessum færslum en færði ekki sönnur fyrir neinum af þessum ásökunum.
