Knattspyrnufélög hér á landi reyna nú að bjarga rekstri sínum með því að lækka laun leikmanna og þjálfara. Kórónuveiran hefur ýtt þessu af stað.

Félögin hafa mörg hver glímt við fjárhagsvandræði í lengri tíma. Veiran hefur svo bætt gráu ofan á svart.

Það vakti mikla athygli í upphafi árs þegar ársreikningur knattspyrnudeildar ÍA leit dagsins ljós, þar kom í ljós að deildin var rekinn með meira en 60 milljóna króna halla á síðustu leiktíð.

Geir Þorsteinsson, var ráðinn framkvæmdarstjóri ÍA á þessu ári og fær það verkefni að taka til í rekstri félagsins. Þetta mikla tap vakti gríðarlega athygli en Skagamenn gátu aðeins greitt helming launa um síðustu mánaðamót.

„Félagið er ekki mjög skuldsett. Það skuldar „bara“ 15 milljónir en mörg önnur félög eru í verri stöðu. Ég sé þessa stöðu sem tækifæri til að taka til í okkar ranni og tryggja rekstrargrundvöllinn,“ segir Geir í samtali við ÍA TV

,Fyrir mér er þetta eins og að tapa 5-0. Spurningin sem þarf að svara er hvað ætlum við að vera föst í því lengi – því að næsti leikur er framundan. Það góða og skemmtilega við fótboltann er að það byrja öll liðin á sama stað þegar mótið hefst að nýju og það er nýtt tækifæri framundan fyrir félagið,“ segir Geir.