Lögmaðurinn Konráð Jónsson smitaðist af Covid-19 sjúkdómnum á dögunum, en hefur náð sér að fullu. Hann gagnrýnir orð Kára Stefánssonar, forstjóra Íslenskrar erfðagreiningar, frá því á blaðamannafundinum í gær, er Kári lofaði smitrakningarteymið fyrir að rekja öll smit nema átta hér á landi.
Konráð veit ekki hvernig hann smitaðist, aðeins að það gerðist innanlands. Hann segir að ekki hafi verið lögð áhersla hjá smitrakningarteyminu að komast að uppruna hans smits:
„Ég var í sambandi við smitrakningateymið fyrstu dagana eftir að ég fékk greininguna, en lítil viðleitni var gerð til að komast að því hvar ég smitaðist – aðallega var verið að reyna að komast að því hvort ég hefði smitað aðra, sem er auðvitað mikilvægt.“
Konráð segir að sitt smit hafi verið flokkað sem innanlandssmit og samkvæmt orðum Kára sé það því fullrakið, sem stangast á við upplifun Konráðs:
„Það hefur enginn hugmynd um hvar ég smitaðist hér á Íslandi. Inni í tölu yfir innanlandssmit, er því fullt af smitum, sem líklega hefur ekki tekist að rekja nákvæmlega, þó að vitað sé að þau hafi átt sér stað hér á landi. Það er því e.t.v. örlítið villandi að halda því fram að það sé búið að rekja öll smit nema átta. Ég myndi a.m.k. halda að það sé örlítið djúpt í árinni tekið að kalla þetta „ótrúlegan árangur“. En kannski er ég haldinn misskilningi,“
segir Konráð.
Í vísindagreininni sem Íslensk erfðagreining fékk birt um rannsóknir sínar hér á landi kemur fram að uppruni stórs hluta smita sé enn órakin.
Grái liturinn stendur fyrir óþekktan uppruna.
