Lögreglan á höfuðborgarsvæðinu fékk tilkynningu um hávaða frá íbúð í miðborginni rétt fyrir klukkan eitt í nótt. Lögregla fær reglulega tilkynningar um hávaða í heimahúsum og er þá oftar en ekki partýhaldi um að kenna. Ekkert partý reyndist vera í þessari tilteknu íbúð því þarna var heimafæðing í gangi. Ekki koma frekari upplýsingar fram um þetta  óvenjulega mál í dagbók lögreglu í morgun.

Lögregla hafði afskipti af hvalaskoðunarskipi sem Landhelgisgæslan færði til hafnar í Reykjavík í gærkvöldi vegna gruns um brot á siglingalögum og farþegafjölda. Um svipað leyti, á tólfta tímanum, var tilkynnt um innbrot í nokkrar geymslur fjölbýlishúss í Hlíðahverfi. Ekki er vitað nákvæmlega hverju var stolið en meðal þess sem íbúar söknuðu má nefna áfengi og myndavél með tilheyrandi búnaði.

Á öðrum tímanum í nótt var tilkynnt um líkamsárás og rán í Kópavogi. Þar var ráðist á mann og síminn hans tekinn af honum. Maður sem grunaður er um árásina var handtekinn síðar um nóttina og vistaður í fangageymslu. Þá var tilkynnt um mikinn eld í húsi við Vesturvör í Kópavogi. Eldur logaði í þaki hússins og stóð slökkvistarf yfir fram eftir morgni.