Í febrúar 2018 hófust feðgar, sem búa í Colorado í Bandaríkjunum, handa við draumaverkefnið sitt. Þeir byrjuðu þá að prenta, með þrívíddarprentara, hina ýmsu hluta Lamborghini Aventador bíls. Þegar upp var staðið  voru þeir búnir að búa til nákvæma eftirlíkingu af slíkum bíl. Faðirinn, Sterling Backus, segir að hann hafi alltaf verið „Lamborghini-strákur“ og 12 ára sonur hans virðist einnig hrifinn af slíkum bílum. En fyrir tveimur mánuðum fengu þeir símtal sem þeir áttu alls enga von á.

CNN skýrir frá þessu. Á hinum endanum var Katia Bassi, markaðsstjóri Lamborghini. Backus segir að símtalið hafi verið eins og að „fá hringingu frá páfanum“.

Erindi Bassi var að fá bíl þeirra feðga lánaðan til að nota í jólaauglýsingu og áttu Backus og fjölskylda hans að koma fram í auglýsingunni. Á móti bauð Bassi þeim að fá ekta Lamborghini Aventador lánaðan í tvær vikur.

Slíkur bíll kostar sem svarar til rúmlega 60 milljóna íslenskra króna í Bandaríkjunum.

Feðgarnir voru að vonum alsælir með þetta og segist Backu hafa notað bílinn á hverjum degi í þessar tvær vikur.