Sarah Marie Clark, 18 ára, var vön að plokka augabrúnirnar í hverri viku. En hún hefur sagt skilið við plokkarann og fær nú fleiri boð á stefnumót en áður.

Hún opnar sig um þetta í viðtali við The Sun.

„Ég hef alltaf vitað að ég gæti verið með samvaxna augabrún, en eins og allir aðrir þá bara fjarlægði ég hárin á milli án þess að pæla eitthvað frekar í því. Ég hélt að það væri ekki möguleiki að halda þeim,“ segir hún.

Sarah Marie er förðunarfræðingur og fyrirsæta frá Danmörku. Hún segir að vinir hennar og strákarnir sem hún var að hitta voru ekki hrifnir að þeirri hugmynd að hún myndi leyfa augabrúnum sínum að vaxa.

„Áður en ég leyfði hárunum að vaxa var ég vön að segja strákunum sem ég var að hitta að mig langaði að hætta að plokka mig, og þeir sögðu: „Nei ekki gera það, þá áttu eftir að líta út fyrir að vera skrýtin.“ Ætli þannig sé ekki stefnumótamenning unglinga,“ segir Sarah Marie.

„Þetta breytir andlitinu þínu frekar mikið og ég var spurð hvað ég myndi gera ef ég væri ekki hrifin af því, ég svaraði þá að ég myndi þá bara raka á milli.“

Sarah Marie segir að hún hafi byrjað á því að teikna á sig samvaxna augabrún og hafi verið svo hrifin af því að hún ákvað að slá til.

Síðan þá hefur hún fengði fjölda verkefna sem fyrirsæta og segir að karlmenn fá ekki nóg af útliti hennar.

„Oftast hræðir þetta menn í burtu, en ég held að það sé jákvætt því það þýðir að þetta hræðir slæmt fólk í burtu og ég get losað mig við alla fávitana,“ segir hún.

„Ég hef eytt flestum skilaboðunum því mér finnst þau óþægileg en einn gaur sendi mér skilaboð og sagðist gera hvað sem er til að hitta mig og fara á stefnumót með mér, vegna samvöxnu augabrúnar minnar. Ég held að sumir karlmenn séu með blæti fyrir þessu. Sumir karlmenn senda mér einkaskilaboð. Ég fæ mikið af boðum á stefnumót, menn reyna við mig.“

En viðbrögðin við augabrúnunum eru ekki aðeins jákvæð, heldur hefur hún fengið mörg neikvæð og ljót skilaboð. Þrátt fyrir það vill hún ekki plokka samvöxnu augabrún sína.

Hún hefur einnig lent í leiðinlegum atvikum, eins og þegar hún var í strætó og fjórar unglingsstelpur fóru að taka myndir af henni og öskra á hana.

„En brandarinn er á þeirra kostnað því ég fæ tækifæri og vinnu vegna augabrúnar minnar,“ segir hún.