Í nýrri bók er því haldið fram að bílslysið sem varð Nóbelsverðlaunahafanum Albert Camus að bana hafi ekki verið neitt slys heldur skipulagt morð sem sovéska leyniþjónustan KGB stóð á bak við að skipun utanríkisráðherra landsins. Camus lést í bílslysi þann 4. janúar 1960. Bílstjórinn missti stjórn á bílnum sem lenti á tré. Þremur árum áður hafði Camus fengið bókmenntaverðlaun Nóbels.

Samkvæmt frétt The Guardian þá segir ítalski prófessorin Giovanni Catelli í nýrri bók sinni, „The Death of Camus“, að slysið hafi verið morðtilræði sem KGB stóð á bak við að skipun Dmitrij Sjepilov utanríkisráðherra.

Catelli kynnti þessa kenningu sína fyrst til sögunnar 2011 og byggði hana þá á kenningu í bók eftir tjékkneska skáldið Jan Zábrana. Catelli segir að nokkrar ástæður hafi legið að baki ósk ráðherrans um að koma Camus fyrir kattanef. Í grein sem Camus skrifaði um uppreisnina í Ungverjalandi 1956 réðst hann harkalega á Sjepilov og sagði hann bera ábyrgð á hrottafenginni framgöngu Sovétmanna. Hann gagnrýndi einnig þær aðferðir sem sovéskir hermenn beittu til að kveða niður uppreisn verkamanna í Austur-Berlín 1953 og var þyrnir í augum sovéskra yfirvalda fyrir að taka afstöðu með sovéska rithöfundinum Boris Pasternak sem var talinn „and-sovéskur“.