Lögum samkvæmt ber sveitarfélögum að veita stjórnmálasamtökum fjárframlög. Allur gangur er þó á því hvort þeim lögum sé framfylgt og sum sveitarfélög höfðu ekki einu sinni vitneskju um lögin. Þá hafa fá sveitarfélög sett sér reglur um framlögin, samkvæmt minnisblaði Sigurðar Á. Snævarr, sviðsstjóra hag – og upplýsingasviðs Sambands íslenskra sveitarfélaga sem lagt var fram á síðasta stjórnarfundi og Morgunblaðið greinir frá.

Sambandinu er gert að setja viðmiðunarreglur og sveitarfélögunum skylt að veita árleg framlög sem fengið hafa að minnsta kosti einn mann kjörinn í sveitastjórn, samkvæmt lagabreytingum um fjármál stjórnmálasamtaka og frambjóðanda á síðasta ári. Samkvæmt eldri lögum voru sveitarfélög með færri en 500 íbúa undaþegin greiðsluskyldunni.

Samkvæmt minnisblaðinu nýtti SÍS sér ekki lagaheimild til að setja viðmiðunarreglur og leituðu allmörg sveitarfélög ráða um hvernig ætti að standa að þessu.

Samkvæmt könnun frá 2011 greiddu 25 sveitarfélög með fleiri en 500 íbúa framlögin, og eitt með færri íbúa. Af 41 sveitarfélagi það ár, gerðu 16 ekki ráð fyrir að greiða framlögin. Framlögin voru þá mishá, það hæsta 862 krónur per íbúa, það lægsta 43 krónur en meðaltalið var 196 krónur. (243 krónur að núvirði).

Samkvæmt minnisblaðinu er misbrestur á að lögunum sé framfylgt, miðað við fyrirliggjandi upplýsingar, en haft var samband við 15 af þeim sveitarfélögum sem tóku þátt í könnuninni 2011. Sum greiddu aðeins styrki í aðdraganda kosninga, önnur greiða ekki neitt og vissu ekki af lögunum.

Samkvæmt minnisblaðinu er lagt upp að SÍS setji viðmiðunarreglur um framlögin og er lagt til að upphæðin verði 150 krónur fyrir hvern íbúa með kosningarétt.