„Ég var búinn að vinna svo lengi með þessu fólki og ég á bara svo erfitt með að trúa þessu,“ segir Sigursteinn Ingvarsson, sem var fjármálastjóri Samherja í 14 ár, þangað til að hann hætti árið 2016, við Stundina.
Samkvæmt Samherjaskjölunum hafði Sigursteinn réttindi til að millifæra og hafa umsjón með bankareikningi félags Samherja á Kýpur, Esju Seafood, sem til dæmis var notað til að greiða mútur upp á hálfan milljarð króna til Tundavala Investments í Dubai, að sögn Stundarinnar.
Sigursteinn segir við Stundina að hann hafi ekkert vitað um mútugreiðslurnar. Þá segir hann einnig að hann hafi ekki vitað af því að hann hefði haft leyfi til að millifæra af reikningi Esju Seafood:
„Nei. Ok, ég vissi það ekki. Þetta kemur mér verulega á óvart. Ég þekki þetta ekki.“
Segir Sigursteinn að hann hafi fyrst frétt af málinu í fjölmiðlum og að þó svo hann hafi verið fjármálastjóri hafi hann ekki haft vitneskju um allt sem fór fram í fjölmörgum félögum Samherja:
„Það eru 130 félög í samstæðunni og ég treysti bara þeim uppgjörum sem komu frá endurskoðendum í hverju landi, og að þeir fjármálastjórar sem væru að vinna í þessum löndum úti, og allan heim, væru að vinna vinnuna sína. Ég fylgdist ekki með einstaka greiðslum úti í heimi. Ég fylgdist bara með því uppgjörin væru endurskoðuð. Ég var ekki að velta því fyrir mér hvert greiðslurnar fóru í hverju landi fyrir sig. Einungis endurskoðuð uppgjör fengu ekki að fara inn í samstæðu Samherja. Þetta er náttúrulega gríðarlega stór samstæða. Ég fylgdist með rekstrinum en ekki einstaka peningafærslum.“
Stundin tekur fram að engin gögn sýni fram á að Sigursteinn hafi komið að því að skipuleggja mútugreiðslurnar. Engir tölvupóstar eða önnur gögn sýni fram á aðkomu hans að einhverju vafasömu. Hinsvegar er sagt að Sigursteinn hafi hinsvegar verið einn háttsettasti stjórnandi félagsins.
Sigursteinn segist hinsvegar ekkert hafa vitað um neitt vafasamt:
„Auðvitað var rætt um þessi félög og farið yfir reksturinn almennt, en daglegur rekstur er bara í viðkomandi landi /
En eins og ég segi þá finnst mér bara eðlilegt á þessari stundu að málið verði rannsakað. Ég tjái mig kannski meira um þetta eftir það.“
